Një operacion policor në Torino të Italisë ka çuar në arrestimin e një 42-vjeçari shqiptar, të dyshuar si pjesë e një bande grabitësish të njohur si “skifterë”, e përfshirë në vjedhje të përsëritura në zonë.
Ngjarja ndodhi mëngjesin e 21 marsit, kur efektivët e policisë së UPGSP-së, gjatë patrullimit në Via Sospello, vunë re një person që përdorte një elektrik dore për të kontrolluar pjesën e sipërme të një dere, duke ngjallur dyshime.
Pasi mbërritën në ndërtesë, oficerët kryen një kontroll të brendshëm. Teksa iu afruan një dere, dëgjuan zhurma nga brenda. Pak çaste më vonë, tre persona dolën me shpejtësi dhe u larguan në drejtime të ndryshme, duke hedhur sende gjatë arratisjes.
Falë reagimit të menjëhershëm, policia ndaloi 42-vjeçarin shqiptar. U konstatua se autorët kishin hyrë në bodrume duke thyer drynat me forcë.
Gjatë kontrollit në zonën ku kaluan dy prej të dyshuarve, përfshirë të arrestuarin, u gjet një pistoletë e raportuar e vjedhur më parë, me një fishek në karikator. U sekuestrua gjithashtu një çantë me sende me vlerë, si unaza, byzylykë, varëse dhe orë, të dyshuara si të përfituara nga vjedhjet.
Nga kontrolli personal i 42-vjeçarit iu gjetën 740 euro, të cilat dyshohet se vijnë nga aktiviteti kriminal.
Policia vazhdon kërkimet për dy bashkëpunëtorët e tjerë. Hetimet janë në zhvillim për zbardhjen e plotë të veprimtarisë së grupit.