Karabinierët e Kompanisë Bassano del Grappa, me mbështetjen e njësive lokale, kryen një operacion të gjerë më 26 shkurt 2026 në komunat Corsico, Buccinasco dhe Trezzano sul Naviglio pranë Milanos. Si rezultat, arrestuan në flagrancë tre shtetas shqiptarë të moshës 37, 38 dhe 40 vjeç për posedim të paligjshëm të armëve, municioneve dhe marrje të mallrave të vjedhura.
Të arrestuarit dyshohen se kryen vjedhje të rënda në zonën e Vicenzës në fund të qershorit 2025. Natën mes 25 dhe 26 qershorit, ata grabitën një depo me shumicë në Isola Vicentina (Via Vicenza), duke thyer një derë të pasme dhe duke manipuluar sistemin e alarmit. U vodhën shishe vere dhe shampanjeje të shtrenjta, pajisje kompjuterike, mbi 15.000 euro para të gatshme, për një dëm total prej rreth 25.000 eurosh.
Po atë natë, ata tentuan të grabisin një kompani të specializuar në trajtime galvanike në Isola Vicentina, por u penguan nga sistemi i alarmit. Mes 26 dhe 27 qershorit, kryen një grabitje në një biznes në Villaverla (Via dell’Artigianato), ku vodhën çeqe, instrumente pagese dhe 10.600 euro para të gatshme.
Hetimet tregojnë se të arrestuarit udhëtonin rregullisht natën nëpër Italinë Veriore, duke përfshirë Toskanën, Emilia-Roagnën dhe Marçen, me makina të mëdha të regjistruara për palë të treta dhe targa të klonuara. Gjatë bastisjeve, sidomos në një garazh në Trezzano sul Naviglio të përdorur si bazë logjistike, u sekuestruan:
- 53.000 euro dhe mbi 2.000 dollarë para të gatshme;
- 5 orë luksoze dhe 11 çekë udhëtimi me vlerë 940 dollarë;
- Bizhuteri të ndryshme, si byzylykë e gjerdanë;
- 23,5 kg skrap argjendi;
- Dy targa të klonuara dhe 63 plumba të kalibreve të ndryshme;
- Një pistoletë kalibër 9×21, e vjedhur në shtator 2024 nga një argjendar në Arezzo.
Të arrestuarit u transferuan në burgun San Vittore të Milanos. Hetimet vazhdojnë për të identifikuar kompani të tjera të prekura dhe për të kthyer mallrat e sekuestruara.