Një 37-vjeçar shqiptar me banim në Cassano d’Adda pranë Milanos u arrestua nga karabinierët italianë. Ai ishte shpallur në kërkim për tentativë vjedhjeje dhe dhunë ndaj efektivëve të rendit.
Ngjarja ndodhi në mbrëmjen e 12 tetorit në Arzago d’Adda. Së bashku me një bashkëpunëtor 47-vjeçar shqiptar, po tentonte të hynte me forcë në banesën e një 85-vjeçari. Dy karabinierë, jashtë detyrës dhe në shoqëri të familjeve të tyre, i vunë re dhe ndërhynë.
Gjatë përleshjes fizike, efektivët pësuan lëndime, por arritën të ndalonin bashkëpunëtorin 47-vjeçar. 37-vjeçari u largua dhe qëndroi i arratisur për gjashtë muaj. Ai ishte në liri me kusht dhe nën mbikëqyrje sociale që nga tetori 2025.
Falë pamjeve nga kamerat e sigurisë dhe hetimeve, karabinierët e Treviglio dhe Pioltello e identifikuan dhe e arrestuan në banesën e tij. Prokuroria e Bergamo kishte lëshuar urdhër arresti me burg.
Gjatë kontrollit, u gjetën bizhuteri ari dhe një armë elektrike taser e mbajtur ilegalisht. Për këto sende, ai do të përballet me akuza të reja në Prokurorinë e Milanos. I arrestuari u dërgua në burgun San Vittore në Milano.