Policia italiane arrestoi një shtetas shqiptar 37-vjeçar në Bergamo pas pesë muajsh kërkimesh. Ngjarja ndodhi në tetor të vitit 2025 në Arzago d’Adda, ku ai bashkë me një bashkëpunëtor u kapën në flagrancë duke tentuar të hapnin derën e banesës së një 85-vjeçari.
Me mbërritjen e karabinierëve, situata u përshkallëzua në përplasje të dhunshme. Të dyshuarit përdorën sprej irritues dhe mjete të forta për të goditur efektivët. Një karabinier përfundoi në spital me nofull të thyer, traumë në kokë dhe dëmtime që kërkuan 30 ditë mjekim.
Bashkëpunëtori u arrestua në vendngjarje, ndërsa 37-vjeçari arriti të arratiset. Pas analizimit të kamerave të sigurisë dhe hetimeve, policia e identifikoi dhe e lokalizoi në banesën e tij. Gjatë kontrollit iu gjetën bizhuteri ari dhe një armë elektrike e mbajtur në mënyrë të paligjshme.
I arrestuari kishte precedentë penalë të mëparshëm dhe ndodhej nën një masë alternative sigurie. Ai u dërgua në burgun e San Vittore, ndërsa ndaj tij janë ngritur akuza të tjera.