Specialistët e Seksionit për Hetimin e Krimeve në Komisariatin e Policisë Sarandë finalizuan operacionin policor të koduar “Kamuflimi”.
Në kuadër të këtij operacioni u arrestuan në flagrancë dy shtetas, Renato Makri, 51 vjeç, dhe Ilir Prenga, 22 vjeç, banues në Sarandë.
Nga veprimet hetimore rezultoi se këta shtetas kryenin veprimtari të paligjshme në fushën e shitjes së lëndëve narkotike. Ata kishin përshtatur ambientet e një lavazhi automjetesh në rrugën “Idriz Alidhima”, Sarandë, si bazë për shpërndarjen e lëndëve narkotike.
Gjatë kontrollit të ushtruar në këtë ambient, shërbimet e policisë gjetën dhe sekuestruan në cilësinë e provës materiale rreth 1 kg lëndë narkotike cannabis sativa, si dhe sende të tjera për ndarjen dhe ambalazhimin e saj, konkretisht:
- 2 targa automjetesh;
- 1 targë motomjeti;
- letër alumini.
Materialet procedurale iu referuan Prokurorisë pranë Gjykatës së Juridiksionit të Përgjithshëm Sarandë, për veprime të mëtejshme.
Operacioni u zhvillua në vijim të punës intensive operative dhe hetimore për goditjen e veprimtarive kriminale në fushën e narkotikëve.