Policia e Vlorës ka zhvilluar dy operacione të koduara, Siguria dhe Transportuesit, në kuadër të luftës kundër armëmbajtjes pa leje dhe shpërndarjes së lëndëve narkotike. Si rezultat i këtyre aksioneve, të finalizuara brenda 24 orëve të fundit, janë arrestuar 4 shtetas dhe janë sekuestruar 2 automjete.
Në Vlorë, në kuadër të operacionit Siguria, është ndaluar shtetasi E. O., 30 vjeç. Arrestimi i tij u krye në parkingun e një lokali në zonën e Lungomares, pasi gjatë kontrollit fizik iu gjet një armë zjarri pistoletë me 6 fishekë, 2.18 gramë kokainë dhe 4.46 gramë kanabis sativa.
Ndërkohë, në Sarandë, pas një hetimi 3-javor me metoda speciale, forcat e rendit finalizuan operacionin Transportuesit. Ky aksion u zhvillua nga Komisariati i Policisë Sarandë, në bashkëpunim me Drejtorinë e Forcës së Posaçme Operacionale të DPPSh-së dhe Forcën Kombëtare të Sigurisë. Në pranga ranë shtetasit:
• Argjend Nanaj, 31 vjeç, banues në Lukovë
• Ardit Cama, 30 vjeç, banues në Lukovë
• Keldi Jovani, 26 vjeç, banues në Sarandë
Tre të arrestuarit u kapën në flagrancë në aksin rrugor Nivicë–Sarandë, pranë urës së Kakomesë, ndërsa lëviznin me dy automjete. Gjatë kontrollit të mjetit që drejtohej nga Argjend Nanaj, ku ndodhej edhe Ardit Cama, policia gjeti dhe sekuestroi 5 kilogramë kanabis sativa, sasi e cila dyshohet se kishte për qëllim tregtimin në zonën e Sarandës dhe Ksamilit. Sipas hetimeve paraprake, shtetasi Keldi Jovani dyshohet se përdorte automjetin e dytë për të monitoruar itinerarin dhe për të njoftuar bashkëpunëtorët mbi praninë e shërbimeve të policisë. Materialet procedurale janë referuar në Prokurori për veprime të mëtejshme.