Seksioni për Hetimin e Narkotikëve në Drejtorinë Vendore të Policisë Vlorë, në bashkëpunim me shërbimet operacionale dhe nën drejtimin e Prokurorisë, ka finalizuar operacionin e koduar "WEST". Aksioni u zhvillua pas informacioneve operative në lidhje me persona që transportonin dhe shpërndanin lëndë narkotike në qytetin bregdetar.
Në pranga ranë tre shtetas shqiptarë nga Lezha: N. K. (20 vjeç), R. H. (20 vjeç) dhe M. M. (23 vjeç). Gjithashtu, u arrestuan dy shtetas italianë: C. L. (42 vjeç), banues në Romë, dhe C. S. (37 vjeç), banues në Palermo.
Ndërhyrja e policisë ndodhi në zonën e Zvërnecit. Gjatë kontrollit fizik, kontrollit të automjetit dhe banesës ku qëndronin të dyshuarit, në lagjen "Uji i Ftohtë", u gjetën dhe u sekuestruan në cilësinë e provës materiale:
- 700 doza të lëndëve narkotike "Tusi", "Ketaminë", "MDMA", kokainë, ekstazi dhe kanabis.
- Një shumë parash, e dyshuar si e përfituar nga aktiviteti kriminal.
- 8 aparate celularë.
Hetimet paraprake tregojnë se të arrestuarit shisnin lëndët narkotike në ambiente të frekuentuara si plazhet dhe lokalet gjatë sezonit turistik. Materialet procedurale i janë referuar Prokurorisë për veprën penale "Prodhimi dhe shitja e narkotikëve", kryer në bashkëpunim.
Përditësime
Policia e Shtetit ka identifikuar pesë personat e arrestuar gjatë operacionit antidrogë në Vlorë: Niko Kolecaj, Rigest Hajdaraj, Mateo Macaj, Christjan Liuzzi dhe Christian Spano.