Specialistët e Seksionit për Hetimin e Narkotikëve në Drejtorinë Vendore të Policisë Vlorë organizuan dhe finalizuan operacionin policor të koduar “Brotherhood”, pas informacioneve operative për transport dhe shitje lënde narkotike.
Shërbimet e policisë ndaluan dhe kontrolluan një automjet tip Volkswagen Touran, me të cilin udhëtonin dy shtetas. Nga kontrolli i mjetit u sekuestrua një sasi lënde e dyshuar narkotike kanabis, e përgatitur për shitje.
Në vijim të veprimeve procedurale:
• Në banesën e shtetasit Fioraldo Meminaj, 41 vjeç, banues në fshatin Trevllazër, Vlorë, u gjet dhe u sekuestrua një sasi tjetër kanabisi, duke arritur gjithsej rreth 57 kg lëndë narkotike e dyshuar kanabis.
• Në banesën e shtetasit Lirim Likaj, 40 vjeç, banues në fshatin Mavrovë, Vlorë, u sekuestrua një armë zjarri automatike model 56, së bashku me një karikator me 30 fishekë luftarakë.
Të arrestuarit akuzohen për veprat penale “Prodhimi dhe shitja e narkotikëve” dhe “Mbajtja pa leje e armëve dhe municionit luftarak”. Materialet procedurale iu referuan Prokurorisë për veprime të mëtejshme.
Hetimet vijojnë për zbulimin e plotë të veprimtarisë së paligjshme dhe identifikimin e personave të tjerë të përfshirë.