Seksioni për Hetimin e Narkotikëve i DVP Vlorë, në bashkëpunim me Prokurorinë pranë Gjykatës së Shkallës së Parë të Juridiksionit të Përgjithshëm Vlorë, ka finalizuar operacionin e koduar “Ruloti”. Si rezultat i administrimit të shpejtë të informacioneve, forcat e rendit kanë arrestuar në flagrancë dy persona në fshatin Dhërmi, të cilët dyshohet se ushtronin veprimtari kriminale të shitjes së lëndëve narkotike.
Personat e arrestuar janë shtetasit F. B., 31 vjeç, banues në Fier, dhe E. K., 27 vjeç, banues në Vlorë. Sipas njoftimit zyrtar, dy të dyshuarit u pikasën nga shërbimet e Policisë në afërsi të një beach bar-i, ku posedonin doza të dyshuara kokaine dhe Cannabis Sativa me qëllim shitjen. Gjatë kontrolleve të mëtejshme të ushtruara në automjetin e 31-vjeçarit, si dhe në rulotin ku ai qëndronte, policia gjeti sasi shtesë të lëndëve narkotike.
Në cilësinë e provës materiale u sekuestruan në total rreth 150 doza kokaine dhe kanabisi, si dhe automjeti në pronësi të 31-vjeçarit. Materialet procedurale i janë referuar Prokurorisë për hetime të mëtejshme mbi veprën penale “Prodhimi dhe shitja e narkotikëve”.