Policia e Vlorës arrestoi në flagrancë shtetasin Eduard Piro, 36 vjeç, banues në Lushnjë, për shpërndarje lëndësh narkotike në zonën e Dhërmiut.
Ai u ndalua teksa drejtonte një automjet tip Volkswagen në Dhërmi. Gjatë kontrollit fizik dhe të automjetit, efektivët gjetën një sasi kanabis të ndarë në doza dhe të gatshme për shitje.
Hetimet u zgjeruan në banesën e tij në Drimadhë, ku u zbuluan rreth 450 gramë kanabis dhe një sasi kokainë, po ashtu të ndara në doza për tregtim.
Si prova materiale u sekuestruan lëndët narkotike, automjeti dhe telefoni celular i të arrestuarit. Materialet procedurale i janë kaluar Prokurorisë së Vlorës për veprime të mëtejshme.
Ndaj Eduard Piro rëndon akuza për "Prodhimin dhe shitjen e narkotikëve". Policia ka nisur hetimet për zbardhjen e plotë të rastit, në kuadër të kontrolleve të shtuara kundër trafikut të drogës në zonat turistike.