Specialistët e Seksionit për Hetimin e Narkotikëve të DVP Vlorë goditën një rast të shitjes së lëndëve narkotike në qytet, pas informacioni për aktivitet kriminal.
Si rezultat i veprimeve hetimore, u arrestua në flagrancë shtetasi B. L., 53 vjeç, banues në Maqedoninë e Veriut. Ai kishte marrë me qira një banesë në lagjen "10 Korriku" për të fshehur dhe përgatitur lëndët narkotike kokainë dhe cannabis sativa, në sasi të vogla për shitje.
Gjatë kontrollit në banesë u identifikuan dy bashkëpunëtorë: A. I., 31 vjeç, banues në Vlorë, dhe K. A., 27 vjeç, banues në Berat. Për ta u referuan materialet në Prokurori, ku nisi procedimi penal.
Në banesë u gjetën dhe u sekuestruan sasi lëndësh të dyshuara narkotike kokainë dhe cannabis sativa, 1 peshore elektronike si dhe 3 celularë, në cilësinë e provës materiale.
Materialet iu kaluan Prokurorisë së Vlorës për veprën penale “Prodhimi dhe shitja e narkotikëve”.