Policia e Tiranës ka ndaluar dy persona, përkatësisht një 29-vjeçar dhe një 32-vjeçare, të cilët janë të afërm të viktimës, pasi dyshohen për kryerjen e veprave penale të abuzimit seksual ndaj një vajze 12-vjeçare. Të arrestuarit janë identifikuar si K.B., djali i hallës së vajzës, dhe D.S., tezja e saj.
Ngjarja u bë publike pas një sinjalizimi nga autoritetet e shkollës ku mësonte e mitura. Gjatë kontrollit, në celularin e vajzës u gjetën materiale filmike intime, të cilat çuan në dokumentimin e rastit dhe arrestimin e familjarëve. Sipas informacioneve nga grupi hetimor, e mitura dyshohet se është detyruar të kryejë marrëdhënie seksuale dhe të realizojë video intime për të kënaqur epshet e të afërmve të saj.
Autoritetet policore kanë njoftuar prindërit e 12-vjeçares dhe kanë angazhuar specialistë psikologë për trajtimin e gjendjes së saj emocionale. Ndaj K.B. dhe D.S. rëndojnë akuzat për marrëdhënie seksuale me të mitur, incest dhe pornografi. Përveç abuzimit me të miturën, hetimet po sqarojnë edhe natyrën e lidhjes intime midis dy të dyshuarve, të cilët po mbahen në paraburgim ndërsa procedurat hetimore vijojnë për të zbardhur plotësisht rrethanat e ngjarjes.