Efektivët e Komisariatit të Policisë Nr. 4 në Tiranë kanë vënë në pranga Julian Allën, 31 vjeç, nën dyshimin për kryerjen e veprave penale të “Ngacmimit seksual” dhe “Heqjes së paligjshme të lirisë”. Arrestimi i tij është kryer të dielën, më 2 gusht 2026.
Sipas hetimeve paraprake, i mituri 13-vjeçar është mbajtur në banesën e 31-vjeçarit, në rrugën “Bardhyl”, nga ora 21:00 e datës 23 korrik deri në orën 00:45 të datës 24 korrik. Burime hetimore bëjnë me dije se i mituri ka deklaruar në prani të prindërve dhe të psikologut se është ngacmuar seksualisht, duke u prekur në organet gjenitale, dhe se është mbajtur kundër dëshirës së tij për disa orë.
Nga ana tjetër, Julian Alla ka mohuar akuzat e ngritura ndaj tij përpara hetuesve policorë. Sipas informacioneve, 31-vjeçari njihet në zonë si përdorues i lëndëve narkotike. Grupi hetimor është duke vijuar punën për zbardhjen e plotë të rrethanave të ngjarjes. Çdo person prezumohet i pafajshëm derisa fajësia e tij të vërtetohet me vendim gjyqësor të formës së prerë.
Përditësime
Hetimet ndaj Julian Allës, 31-vjeçarit të arrestuar për ngacmim dhe pengmarrje, janë thelluar pas kallëzimit të bërë nga i mituri dhe familjarët e tij më 24 korrik. Sipas akteve procedurale të administruara nga Komisariati nr. 4, i mituri është mbajtur kundër dëshirës në banesën e të dyshuarit për rreth dy orë.
Burimet hetimore bëjnë me dije se i dyshuari Julian Alla, 31 vjeç, dhe 13-vjeçari kishin njohje të mëparshme. Sipas hetimeve, i mituri shkoi në banesën në rrugën Bardhyl pasi u thirr nga 31-vjeçari, i cili më pas e ka penguar me forcë atë të largohej.