Një 17-vjeçar u arrestua në Tiranë, ndërsa bashkëpunëtori i tij, shtetasi E. D., 21 vjeç, u shpall në kërkim, pasi kanosën një 38-vjeçare për t’i dhënë 500 euro që të mos publikonin foto dhe video intime në rrjete sociale. Ngjarja u zbulua menjëherë pas kallëzimit të gruas në polici.
Specialistët e Seksionit për Hetimin e Krimeve ndaj Pronës, në Drejtorinë Vendore të Policisë Tiranë, organizuan dhe finalizuan operacionin e koduar “Privacy”. Si rezultat, u vu në pranga 17-vjeçari, ndërsa punohet për kapjen e 21-vjeçarit, i cili dyshohet si autor i vjedhjeve në disa subjekte në Tiranë.
Në cilësinë e provës materiale u sekuestruan 500 eurot e marra nga 38-vjeçarja dhe 2 celularë. Materialet procedurale iu referuan Prokurorisë së Tiranës për veprime të mëtejshme.
Ndaj të dyshuarve rëndon vepra penale “Shtrëngimi me anë të kanosjes ose dhunës për dhënien e pasurisë”, e kryer në bashkëpunim.