Një 28-vjeçar është arrestuar pasi akuzohet se ka përndjekur dhe kanosur në rrjetet sociale një 37-vjeçare, duke i shkaktuar asaj ankth dhe panik. Arrestimi u krye në kuadër të operacionit policor të koduar Insistimi nga Drejtoria Vendore e Policisë Tiranë.
Sipas njoftimit zyrtar të policisë, arrestimi erdhi pas administrimit të shpejtë të kallëzimit të bërë nga vetë 37-vjeçarja. Specialistët e Sektorit për Hetimin e Krimeve Kibernetike, në bashkëpunim me shërbimet e Komisariatit të Policisë Krujë, lokalizuan dhe vunë në pranga shtetasin L. K., 28 vjeç, banues në fshatin Halilaj, Fushë Krujë.
Gjatë kontrollit, policia sekuestroi dy celularë të të arrestuarit. Nga verifikimet në këto pajisje, u konstatuan llogari false aktive në platformat Instagram dhe TikTok, të cilat ishin përdorur për përndjekjen dhe kanosjen e vazhdueshme ndaj viktimës.
Materialet procedurale iu referuan Prokurorisë së Tiranës për veprime të mëtejshme ligjore. Përndjekja online konsiderohet vepër penale sipas Kodit Penal të Republikës së Shqipërisë, e dënueshme me burgim nga gjashtë muaj deri në katër vjet.