Shërbimet e Komisariatit Nr. 5 të Policisë së Tiranës, në bashkëpunim me Seksionin për Hetimin e Krimeve të Rënda, kanë finalizuar operacionin e koduar Kontigjenti. Gjatë këtij operacioni është parandaluar një ngjarje e mundshme kriminale kundër personit dhe pronës, si dhe janë zbardhur dy ngjarje të mëparshme.
Një patrullë policore i ka bërë shenjë ndalimi motomjetit pa targa me të cilin lëvizte Perikli Doçi, 37 vjeç, banues në Paskuqan. Ai nuk i është bindur urdhrit dhe ka vazhduar lëvizjen me shpejtësi. Ndjekja ka përfunduar me kapjen dhe arrestimin e tij në afërsi të liqenit të Paskuqanit.
Në momentin e ndalimit, Doçi kishte vendosur maskë silikoni. Gjatë kontrollit fizik dhe të motomjetit policia ka sekuestruar:
- sasi lënde eksplozive gati për shpërthim;
- 10 litra lëndë djegëse;
- 1 armë zjarri (pistoletë) me municion;
- 1 maskë silikoni;
- 1 motomjet pa targa, i dyshuar i vjedhur.
Hetimet e mëtejshme kanë konstatuar se Doçi dyshohet si autor i dy ngjarjeve në Paskuqan:
- më 3 tetor 2025, në rrugën Besim Cera, Paskuqan 1, ka qëlluar me armë zjarri drejt banesës së shtetasit Q. K., pastaj ka djegur automjetin e përdorur në afërsi të urës së Tapizës;
- më 17 tetor 2025, në rrugën Unaza e Madhe, Paskuqan 2, ka hedhur lëndë plasëse në banesën e shtetasit Rr. D., duke shkaktuar dëme materiale.
Disa burime përmendin dyshime për konflikt pronësie me banorë të zonës. Materialet procedurale i janë referuar Prokurorisë së Tiranës për veprime të mëtejshme.
Përditësime
Ndjekja filloi në rrugën Mustafa Lita gjatë natës, sipas Policisë së Shtetit.
Prokuroria drejton hetimin për identifikimin e bashkëpunëtorëve të mundshëm dhe zbardhjen e ngjarjeve të tjera kriminale.