Policia e Tiranës ka finalizuar operacionin e koduar "Objektivi", duke identifikuar dhe arrestuar shtetasin Klajdi Muhametaj (K. M.), 43 vjeç, banues në Tiranë. Ai dyshohet si autor i gjashtë rasteve të vjedhjeve dhe tentativave për vjedhje, të kryera gjatë dy ditëve të fundit dhe gjatë vitit 2025. Shërbimet e Seksionit për Hetimin e Krimeve të Rënda, në bashkëpunim me Komisariatin e Policisë Nr. 4, kanë kryer kontrollin në banesën e të dyshuarit.
Sipas hetimeve, më 21 janar 2026, Muhametaj dyshohet se ka vjedhur me thyerje një shumë parash dhe disa dokumente në zyrat e Postës Shqiptare në rrugën "Kujtim Laro", si dhe ka tentuar të vjedhë në filialin e një banke. Gjithashtu, në datat 09.10.2025 dhe 26.11.2025, ai dyshohet se ka vjedhur shuma parash dhe produkte në katër lokale në zona të ndryshme të Tiranës.
Gjatë kontrollit në banesë, policia ka sekuestruar:
• një shumë parash të dyshuar të vjedhur;
• veshje që dyshohet se janë përdorur gjatë vjedhjeve;
• sende të forta për hapjen e dyerve.
Të dyshuari ka precedentë penalë për vjedhje. Hetimet vijojnë për zbardhjen e rasteve të tjera të mundshme. Materialet procedurale i janë kaluar Prokurorisë për veprime të mëtejshme ligjore.