Policia e Tiranës ka arrestuar shtetasin B. H., 38 vjeç, në kuadër të operacionit të koduar “Kopja”. Operacioni u finalizua nga Komisariati Nr. 6, pas një hetimi disamujor në koordinim me Prokurorinë e Tiranës.
Sipas hetimeve, B. H. monitoronte banesat që synonte për vjedhje dhe hynte në to duke përdorur çelësa të kopjuar. Ai merrte para, bizhuteri dhe sende të tjera me vlerë. Dyshohet se ka kryer 4 vjedhje me këtë metodë gjatë vitit 2026. Ai ka precedent penal për vjedhje.
Gjatë operacionit u sekuestruan sende të dyshuara si të vjedhura, si dhe veshje të përdorura gjatë kryerjes së krimeve.
Hetimet vijojnë për zbardhjen e vjedhjeve të tjera që mund të ketë kryer i arrestuari. Materialet procedurale iu referuan Prokurorisë së Tiranës për veprime të mëtejshme.