Shërbimet e Komisariatit të Policisë Nr. 6 në Tiranë finalizuan operacionin e koduar “Penaliteti”, duke arrestuar 26-vjeçarin Agustjan Hyka.
Nga hetimet paraprake dyshohet se i riu, gjatë muajit prill 2026, ka vjedhur shuma parash dhe produkte në 4 subjekte, si dhe ka tentuar të vjedhë në një banesë dhe në një subjekt tjetër.
Verifikimet e mëtejshme konfirmuan se Agustjan Hyka kishte thyer masën e sigurisë “arrest në shtëpi”, të vendosur ndaj tij për veprën penale “Dhuna në familje”.
Operacioni u nis pas kallëzimeve të shtetasve dhe administratorëve të subjekteve për vjedhje të pronës dhe pasurisë.
Hetimet vijojnë për të zbardhur vjedhje të tjera që mund të ketë kryer i dyshuari.
Materialet procedurale iu referuan Prokurorisë së Tiranës për veprime të mëtejshme.