Një 18-vjeçar shqiptar është arrestuar në zonën e Rietit, në Itali, i dyshuar si drejtues i një rrjeti të shpërndarjes dhe trafikut të kokainës. Rrjeti vepronte pranë Piazza Cavour, në qendrën historike të qytetit, dhe frekuentohej nga një numër i madh klientësh, përfshirë të rinj.
I riu ishte nën mbikëqyrje të policisë prej kohësh. Operacioni u krye nga njësia antidrogë e Policisë së Rietit, ku ai u kap dhe u identifikua menjëherë. Pas kësaj, autoritetet kryen kontrolle të mëtejshme dhe bastisën banesën e tij, të vendosur po në qendrën historike.
Gjatë bastisjes, policia gjeti sasi lëndësh narkotike dhe para të gatshme, të dyshuara si të përfituara nga aktiviteti kriminal. Të gjitha u sekuestruan.
18-vjeçari u vendos fillimisht në arrest shtëpiak dhe pritet të përballet me akuzën për posedim të lëndëve narkotike me qëllim trafikimi. Hetimet vijojnë nën drejtimin e hetuesit Marco Stamegna për të identifikuar blerësit dhe bashkëpunëtorët.
Gjykatësi hetues e konsideroi arrestimin të ligjshëm, konfirmoi masën paraprake dhe vendosi ndalimin e të riut për të banuar në të gjithë provincën e Rietit.