Policia e Kosovës ka arrestuar të martën mbrëma, rreth orës 22:15, një person të shpallur në kërkim me urdhërarrest aktiv në qytetin e Shtimes. I dyshuari, 21-vjeçari me inicialet A.S., ishte arratisur nga institucioni korrektues gjatë vuajtjes së dënimit dhe kishte qëndruar jashtë vendit për rreth tri vjet.
Ngjarja nisi kur hetuesit e stacionit policor në Shtime, gjatë patrullimit në rrugën "Tahir Sinani", vërejtën një automjet shoferi i të cilit nuk u dha përparësi këmbësorëve në vendkalimin e shënuar. Pavarësisht urdhrit të policisë për ndalim, drejtuesi i automjetit vazhdoi lëvizjen, duke shtuar shpejtësinë dhe duke kryer manovra të rrezikshme, përfshirë tejkalime mbi trotuar.
Pas një ndjekjeje, i dyshuari hyri në rrugën "12 Qershori", ku për shkak të rrugës pa dalje, u detyrua të ndalte automjetin dhe tentoi të largohej në këmbë. Njëri nga hetuesit arriti ta ndiqte, ta neutralizonte dhe ta arrestonte pas dhënies së urdhrave verbalë.
Gjatë përpjekjes për t'iu shmangur arrestimit, i dyshuari ka shfaqur rezistencë aktive dhe ka pësuar lëndime të lehta trupore. Për këtë arsye, atij i është ofruar trajtim mjekësor në Qendrën Kryesore të Mjekësisë Familjare (QKMF) në Shtime. Me vendim të gjyqtarit kompetent, ndaj 21-vjeçarit është caktuar masa e ndalimit për 48 orë, ndërsa procedurat e mëtejshme ligjore do të vazhdojnë.
Përditësime
Policia Rajonale e Ferizajt ka konfirmuar se 21-vjeçari A.S., i cili ishte në kërkim prej tre vitesh, është arrestuar më 29 korrik 2026 në Shtime.