Policia arrestoi në Tiranë një 23-vjeçar gjatë operacionit të koduar “Infrastruktura”, pasi dyshohet se u shiste pjesëmarrësve në protestat e ditëve të fundit llastiqe gjuetie dhe sfera metalike. Sipas njoftimit policor, ai u kap në flagrancë në rrugën “Tre Dëshmorët”, duke shitur 30 llastiqe gjuetie me sfera metalike, të cilat u sekuestruan si prova materiale. Policia dyshon se ato synoheshin për t’u përdorur kundër punonjësve të Policisë dhe institucioneve.
Disa media e identifikojnë të arrestuarin si Orges Male. Njoftimi i Policisë e përmend me inicialet O. M. dhe thotë se është banues në Tiranë. Arrestimi u krye pas konsultimit me prokurorin nga specialistët e Sektorit për Hetimin e Krimeve Ekonomiko-Financiare.
Pas arrestimit, policia kontrolloi një magazinë që posedonte 23-vjeçari, në rrugën “Kol Koçi”. Sipas njoftimit, aty u gjetën mbi 450 pajisje dhe artikuj pa dokumentacion, mes tyre 239 dronë, 75 llastiqe gjuetie dhe një sasi e konsiderueshme sferash metalike. Në magazinë kishte gjithashtu 44 celularë, 17 pajisje Powerbank, 10 pajisje GPS për lokalizimin e automjeteve, 11 llamba LED dhe 3 dryna elektronikë me GPS.
Lista e sendeve të gjetura përfshin edhe një pajisje elektronike me antenë (RFGS Detector), tri palë syze me videoregjistrues, pajisje DVR, shtatë pajisje Bluetooth për automjete dhe tetë pajisje Blackbox me kamera për automjete. U gjetën gjithashtu një kompresor, tetë elektrikë dore, gjashtë pajisje lazer, dy pajisje Xiaomi Smart Plug 2, tri pajisje elektronike dhe pesë pajisje K-68 për zbulimin e GPS-ve dhe kamerave. Lista përfshin edhe 12 pajisje kompjuterike (mouse), 7 pajisje me lojëra kompjuterike, 7 pajisje Watch 10 Pro Max dhe 8 çanta që hapen me gjurmë gishtash. Sipas Policisë, për pajisjet dhe artikujt nuk u paraqit dokumentacion.
Materialet procedurale iu referuan Prokurorisë për veprime të mëtejshme, për vepra penale që përfshijnë tregtimin dhe transportimin e mallrave kontrabandë, kontrabandën me mallra të tjera, fshehjen e të ardhurave, mospagimin e taksave dhe tatimeve, si dhe ushtrimin e një veprimtarie tregtare të paligjshme ose të paregjistruar. Hetimet vijojnë për dokumentimin e plotë të veprimtarisë së dyshuar dhe identifikimin e personave të tjerë të përfshirë.