Operacioni policor i koduar "Target" është finalizuar me sukses në qytetin e Mamurrasit, duke bërë të mundur kapjen e 27-vjeçarit Edmir Xhaferri. Sipas njoftimit zyrtar të Policisë, i riu është lokalizuar duke qarkulluar me automjet dhe, sapo ka konstatuar shërbimet policore, nuk i është bindur urdhrit për të ndaluar.
Në përpjekje për t'u shmangur ndjekjes, Xhaferri ka shtuar shpejtësinë dhe ka përplasur automjetin e shërbimeve të policisë, duke rrezikuar jetën e punonjësve të pranishëm. Gjatë ndjekjes që pasoi për disa minuta, i riu dyshohet se ka hedhur një armë zjarri pistoletë që e mbante me vete. Arrestimi i tij u bë në lagjen "Zef Hoti" të Mamurrasit.
Në operacion morën pjesë Sektori për Krimet e Rënda, Seksioni i Mbështetjes Operacionale në DVP Lezhë dhe Komisariati i Policisë Kurbin. Si provë materiale janë sekuestruar arma e zjarrit, municioni luftarak, automjeti i përdorur nga 27-vjeçari dhe një palë targa. Materialet procedurale janë referuar në Prokurorinë pranë Gjykatës së Shkallës së Parë të Juridiksionit të Përgjithshëm Lezhë për veprime të mëtejshme.