Policia e Shtetit ka arrestuar shtetasin Leonard Dema, 23 vjeç, lindur në Mamurras, i dënuar me 7 vjet burgim nga Gjykata e Trentos për tentativë vrasjeje. Operacioni u zhvillua nga Drejtoria e Forcës së Posaçme Operacionale pas shkëmbimit të informacioneve me partnerë ndërkombëtarë.
Gjatë ndërhyrjes në një karburant të aksit rrugor Mamurras–Laç, i kërkuari që lëvizte me automjet tentoi të përplase efektivët. Shoqëruesi i tij, shtetasi Amadeo Fufi, 28 vjeç, iu drejtua policisë me armë zjarri pistoletë. Në kushtet e vetëmbrojtjes, shërbimet policore kanë plagosur Leonard Demën.
I plagosuri u transportua në Spitalin e Traumës në Tiranë, ku po merr trajtim mjekësor. Në vijim të veprimeve procedurale u arrestua në flagrancë edhe shtetasi Amadeo Fufi. Policia ka sekuestruar armën e zjarrit pistoletë.
Hetimet vazhdojnë në bashkëpunim me Autoritetin e Mbikëqyrjes së Prokurorisë dhe nën drejtimin e Prokurorisë.