Një operacion i Policisë së Shtetit në Mamurras përfundoi me arrestimin e një personi dhe plagosjen e një tjetri. Gjatë ndërhyrjes në një karburant të aksit rrugor Mamurras-Laç, efektivët tentuan të kapnin Leonard Demën, 23-vjeçarin e shpallur në kërkim nga autoritetet italiane.
Dema ndodhej në automjet bashkë me Amadeo Fufin, djalin e ish-deputetit të Partisë Demokratike Mhill Fufi. Sipas autoriteteve, Dema tentoi të përplase automjetin me policët, ndërsa Fufi drejtoi një armë zjarri pistolete ndaj tyre. Në kushtet e vetëmbrojtjes, policia qëlloi dhe plagosi Demën në bark.
Leonard Dema u transportua në Spitalin e Traumës në Tiranë dhe ndodhet jashtë rrezikut për jetën. Amadeo Fufi u arrestua në flagrancë dhe arma e zjarrit u sekuestrua. Policia vijon hetimet për rrethanat e plota të ngjarjes.
Përditësime
Amadeo Fufi, 28 vjeç, është djali i ish-deputetit të PD-së. Leonard Dema, i lindur në Mamurras, u dënua me 7 vite burg nga Gjykata e Trentos në Itali për tentativë vrasjeje.
Leonard Dema u dërgua fillimisht në urgjencën e Laçit dhe më pas në Spitalin e Traumës, ndërsa hetimet kryhen në bashkëpunim me Agjencinë e Mbikëqyrjes Policore nën drejtimin e prokurorisë.