Policia e Durrësit ka finalizuar operacionin e koduar Target, për zbardhjen e vjedhjeve në disa banesa gjatë periudhës dhjetor 2025-janar 2026.
Si rezultat i hetimeve të specialistëve për Hetimin e Krimeve të Komisariatit të Policisë Durrës, në drejtim të Prokurorisë, u identifikua, u kap dhe u vu në pranga shtetasi D. C., 29 vjeç, banues në Sukth.
Nga hetimet dyshohet se ky shtetas ka kryer 3 vjedhje në banesën e një shtetaseje italiane në zonën Fermë Sukth, ku ka marrë shuma parash, bizhuteri dhe pajisje të ndryshme. Gjithashtu, ai dyshohet si autor i vjedhjeve në 5 banesa të tjera.
Gjatë kontrollit fizik në momentin e ndalimit, 29-vjeçarit iu gjetën një maskë dhe një palë doreza, të cilat dyshohet se i përdorte për kryerjen e vjedhjeve, si dhe një pistoletë sportive që e mbante pa leje.
Hetimet vijojnë për zbardhjen e vjedhjeve të tjera të mundshme të kryera nga ky shtetas. Materialet procedurale i janë referuar Prokurorisë së Durrësit për veprime të mëtejshme, për veprat penale "Vjedhja", kryer më shumë se një herë, dhe "Prodhimi dhe mbajtja pa leje e armëve të gjuetisë dhe sportive".
Përditësime
Burimi 2 publikoi video nga kamerat e sigurisë që kapin 29-vjeçarin e dyshuar, të njohur me nofkën "Skifteri", gjatë vjedhjes.