Operacioni policor u zhvillua nga shërbimet e Stacionit të Policisë Manzë, në bashkëpunim me strukturat operacionale të Drejtorisë Vendore të Policisë Durrës, pas informacioneve të siguruara në rrugë operative. Gjatë kontrollit të ushtruar në banesën e 20-vjeçarit Ergis Pepa, efektivët gjetën dhe sekuestruan në cilësinë e provës materiale një sasi të konsiderueshme armatimi:
• 4 pistoleta;
• 1 armë automatike model 56 (kallashnikov);
• 1 armë gjahu (shotgun);
• 6 krehëra;
• qindra fishekë luftarakë të kalibrave të ndryshëm;
• 1 targë automjeti italiane;
• 1 aparat celular.
Sipas hetimeve paraprake, baza dyshohet se shërbente si pikë furnizimi me armë zjarri për grupe kriminale. Për të verifikuar nëse armët e sekuestruara janë përdorur në ngjarje të mëparshme kriminale, ato do t’i nënshtrohen ekspertizës balistike pranë Institutit të Policisë Shkencore.
I arrestuari akuzohet për veprat penale "Prodhimi dhe mbajtja pa leje e armëve, armëve shpërthyese dhe municionit" si dhe "Prodhimi dhe mbajtja pa leje e armëve të gjuetisë dhe sportive". Materialet i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Durrës, ndërsa vijon puna hetimore për identifikimin e personave të tjerë të përfshirë në këtë veprimtari.