Policia e Durrësit finalizoi operacionin policor të koduar "Kalibri", me qëllim parandalimin e veprimtarive kriminale dhe rritjen e sigurisë publike. Aksioni u zhvillua nga Seksioni për Hetimin e Narkotikëve dhe Komisariati i Policisë Shijak, në bashkëpunim me Forcën e Posaçme Operacionale.
Në hyrje të qytetit të Durrësit, u arrestuan shtetasit L. D. dhe A. M., banues në Lezhë. Ata u kapën duke lëvizur me automjet, ku në çantën e pasagjerit iu gjet një armë zjarri pistoletë me dy krehra dhe fishekë, të cilat dyshohet se po transportoheshin për shitje. Shtetasit L. D. iu gjet gjithashtu një sasi e vogël lënde e dyshuar narkotike Cannabis Sativa.
Në kuadër të të njëjtit operacion, u arrestua shtetasi D. T. në fshatin Shtrazë të Shijakut. Gjatë kontrollit në banesën e tij, forcat e rendit gjetën dhe sekuestruan:
• Një armë zjarri kallashnikov;
• Një granatë mbrojtëse me ndezës të montuar;
• Një krehër arme;
• Qindra fishekë luftarakë.
Materialet procedurale iu referuan Prokurorisë së Durrësit për hetime të mëtejshme mbi veprat penale të mbajtjes pa leje të armëve dhe municioneve luftarake, si dhe prodhimit e shitjes së narkotikëve.
Përditësime
Policia e Shtetit ka bërë publike identitetet e tre personave të arrestuar gjatë operacionit "Kalibri" në Durrës: Lamberto Dinaj dhe Arsildo Marku nga Lezha, si dhe Dervish Tusha nga Shijaku. Të ndaluarit ndodhen në paraburgim në pritje të hetimeve të mëtejshme.