Strukturat e Drejtorisë Vendore të Policisë Shkodër kanë organizuar dhe finalizuar operacionin e koduar “NDËRMOLLASI 2”, në bashkëpunim me Sektorin për Hetimin e Krimeve të Rënda, Seksionin për Mbështetjen Operacionale të Hetimit dhe Seksionin e Forcës së Posaçme “Shqiponja”, në drejtimin e Prokurorisë.
Gjatë kontrollit në banesën e shtetasit R. M., 29 vjeç, në fshatin Ura e Shtrenjtë të Shkodrës – i cili ishte arrestuar më 14 shtator 2025 në kuadër të operacionit “Ndërmollasi” – u gjetën dhe u sekuestruan në cilësinë e provës materiale:
• 11 armë zjarri;
• 5506 fishekë luftarakë;
• 7 krehra armë zjarri automatikë;
• 6 krehra armë zjarri pushkë;
• 35 metra fitil detonator;
• 25.2 kg lëndë e dyshuar narkotike kanabis sativa;
• 2 palë targa të huaja, njëra e Gjermanisë dhe tjetra e Austrisë.
Në vijim të veprimeve procedurale, u arrestuan shtetasit Sami Meaj, 29 vjeç, dhe Selim Myrtja, 31 vjeç, të dy banues në fshatin Ura e Shtrenjtë. Nga hetimet e para, dyshohet se ata janë posedues të sendeve të sekuestruara dhe bashkëpunëtorë të R. M..
Nën drejtimin e Prokurorisë, vijojnë hetimet për dokumentimin e plotë të veprimtarisë kriminale dhe identifikimin e shtetasve të tjerë të përfshirë. Materialet iu referuan Prokurorisë së Shkodrës për veprime të mëtejshme.
Policia ka publikuar pamje video të operacionit të regjistruara me dron, ku shihet momenti i hyrjes në banesë dhe vendndodhja e armëve e lëndës narkotike.