Policia e Durrësit zhvilloi operacionin e koduar „Banesa”, duke arrestuar në flagrancë shtetasin E. K., 30 vjeç, banues në Durrës. Ai u kap në momentin kur tentonte të merrte lëndën narkotike të fshehur në një banesë të pabanuar pranë shtëpisë së tij, në lagjen nr. 8.
Specialistët e Seksionit për Hetimin e Narkotikëve, në bashkëpunim me Forcën e Posaçme Operacionale të Drejtorisë Vendore të Policisë Durrës, vepruan bazuar në informacione operative. Gjatë kontrollit u sekuestruan 8 kilogramë lëndë e dyshuar narkotike Cannabis Sativa, e cila u mor në cilësinë e provës materiale.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Durrës për veprime të mëtejshme, lidhur me veprën penale „Prodhimi dhe shitja e narkotikëve”.
Hetimet vijojnë për dokumentimin e plotë të rastit dhe identifikimin e shtetasve të tjerë që mund të jenë të përfshirë në këtë aktivitet kriminal.