Policia e Tiranës ka finalizuar operacionin policor të koduar "Delivery", për goditjen e një rasti të trafikimit të lëndëve narkotike nga SHBA-ja drejt Shqipërisë. Si pasojë, është arrestuar shtetasi Dorian Sinani, 20 vjeç, banues në Bathore. Sipas hetimeve të zhvilluara nga Seksioni për Hetimin e Narkotikëve nën drejtimin e Prokurorisë së Tiranës, i riu kishte porositur një pako me peshë totale 4 kg e 641 gramë kanabis me përqindje të lartë THC, e cila ishte ndarë në 8 paketime të veçanta.
Sipas informacioneve, operacioni është zhvilluar në bashkëpunim me filialin Qendra Tranzite të Postës Shqiptare, ku u bë e mundur kapja e lëndës narkotike. Hetimet treguan se i riu ishte përpjekur të shmangte identifikimin duke përdorur të dhënat e një karte identiteti të gjetur, si dhe një numër kontakti që nuk i përkiste atij. I dyshuari ishte mbajtur në vëzhgim për rreth 2 javë nga Antidroga e Tiranës, pasi ai ishte shfaqur pranë një pike postare në Shkodër, por ishte larguar pa tërhequr pakon për shkak të pasigurisë.
I riu u lokalizua përmes gjurmimit të lëvizjeve të tij, duke përfshirë automjetin taksi që kishte përdorur, çka çoi policinë drejt banesës së tij në Bathore. Vlera e tregut e lëndës narkotike të sekuestruar vlerësohet të jetë rreth 20 mijë euro. Policia po vijon hetimet për të identifikuar persona të tjerë të mundshëm të përfshirë në këtë aktivitet kriminal. Materialet procedurale i janë referuar Prokurorisë së Tiranës për ndjekje të mëtejshme penale.