Policia e Tiranës ka finalizuar një operacion për goditjen e trafikimit të lëndëve narkotike përmes shërbimit postar. Në pranga ka rënë një 48-vjeçare me nënshtetësi amerikane dhe banuese në Shqipëri, e identifikuar me inicialet Sh.I.
Ngjarja ka nisur pas kontrollit të kryer në doganë, ku autoritetet kanë zbuluar një pako të dërguar nga SHBA, e cila përmbante rreth 572 gramë karamele në formë xhelatine me përmbajtje të dyshuar kanabisi. Për të identifikuar marrësin e dërgesës, efektivët e Antidrogës kanë organizuar një operacion të dorëzimit të kontrolluar. Një agjent i infiltruar, i veshur si postier, ka dërguar pakon në adresën e shtetases amerikane. Menjëherë pasi ajo e ka marrë dërgesën, efektivët kanë ndërhyrë duke e arrestuar në flagrancë.
Gjatë marrjes në pyetje, 48-vjeçarja ka mohuar akuzat. Ajo ka deklaruar se nuk ka porositur asnjë lëndë të paligjshme dhe se pakoja nuk i përket asaj. Aktualisht, autoritetet policore po vijojnë hetimet për të zbardhur rrethanat e rastit dhe për të verifikuar nëse e arrestuara është pjesë e ndonjë rrjeti kriminal të shpërndarjes ose trafikimit të lëndëve narkotike.