Shërbimet e Komisariatit të Policisë Maliq finalizuan operacionin policor të koduar “Sovjani”, në kuadër të goditjes së rasteve të armëmbajtjes pa leje. Operacioni u zhvillua në fshatin Sovjan të Maliqit, ku policia ndaloi një automjet në një rrugë mes parcelave bujqësore, bazuar në informacione për qarkullim të armatosur në zonë.
Gjatë kontrollit në automjet u gjet një armë zjarri automatike. Më pas, në banesën e dyshuarit u konstatua një armë gjahu teke dhe një sasi e vogël municioni luftarak. Sendet e jashtëligjshme, së bashku me automjetin, u sekuestruan si prova materiale.
Si rezultat, u arrestua në flagrancë shtetasi Bexhet Bako (B. B.), 30 vjeç, banues në fshatin Sovjan, Maliq. Ai akuzohet për veprat penale “Mbajtja pa leje dhe prodhimi i armëve, armëve shpërthyese dhe municionit” dhe “Prodhimi dhe mbajtja pa leje e armëve të gjuetisë dhe sportive”.
Materialet procedurale iu referuan Prokurorisë së Korçës për veprime të mëtejshme.