Policia e Sarandës ka vënë në pranga Mariglen Kondin, 30 vjeç, pas një operacioni të zhvilluar mesditën e sotme në lagjen nr. 4 të qytetit, pranë stadiumit. I ndaluari ishte shpallur në kërkim që prej fillimit të këtij muaji, pasi dyshohet si autor i tentativës për rrëmbimin e një shtetaseje nga Nepali pranë doganës së Qafë Botës.
Ngjarja për të cilën akuzohet 30-vjeçari ka ndodhur më 2 korrik 2026, rreth orës 18:53, në vendin e quajtur “Postbllok”, përgjatë aksit rrugor Konispol – Qafë Botë. Sipas hetimeve, i dyshuari ka tentuar disa herë ta fusë me forcë të renë në automjetin e tij. Viktima ka arritur të shpëtojë duke u larguar me vrap nga vendngjarja, pas së cilës ka kryer denoncimin pranë organeve të rendit.
Identifikimi i të dyshuarit u bë i mundur përmes këqyrjes së kamerave të sigurisë nga ana e shërbimeve të Policisë së Sarandës. Mariglen Kondi rezulton të jetë një person me precedentë të shumtë penalë. Në vitin 2020, ai ishte arrestuar për veprën penale “kultivim bimësh narkotike” të kryer në bashkëpunim, masë e cila u ndryshua më pas në “Arrest në shtëpi”. I ndaluari e ka shkelur këtë masë sigurimi, ndërsa në vitin 2021 është arrestuar sërish për vjedhjen e disa kamionçinave në zonën e Lushnjes.