Policia ka arrestuar sot shtetasin Elidon Pashaj, 32 vjeç, banues në Vlorë, pas vdekjes së punëtorit Kreshnik Haska, 45 vjeç, banues në Gjirokastër. Ngjarja ndodhi të shtunën në vendin e quajtur Palasë–Dhërmi, në një kantier ndërtimi të një kompleksi turistik.
Sipas njoftimit të policisë, Pashaj dyshohet se gjatë një manovre të gabuar me mjetin eskavator ka goditur aksidentalisht viktimën, e cila humbi jetën si pasojë. Arrestimi u bë nga specialistët për Hetimin e Krimeve në Komisariatin e Policisë Himarë.
I arrestuari akuzohet për veprat penale “Drejtimi i automjeteve në mënyrë të parregullt” dhe “Shkelja e rregullave të mbrojtjes në punë”. Forcat e policisë po vazhdojnë punën për sqarimin e rrethanave dhe dokumentimin e plotë të ngjarjes.