Pas publikimit të një videoje në rrjetet sociale, e cila tregonte një qytetar duke thyer me grushte xhamat e një autobusi urban, Policia e Shtetit reagoi duke identifikuar dhe arrestuar autorin e dyshuar. Ngjarja është regjistruar gjatë pasdites në rrugën “Muhamet Gjollesha”, në afërsi të Komisariatit Nr. 2 të kryeqytetit.
Sipas njoftimit zyrtar, incidenti ka ndodhur për motive të dobëta pas një debati të çastit mes 33-vjeçarit dhe drejtuesit të mjetit. Shtetasi me inicialet Ç. K. ka fyer drejtuesin e autobusit dhe ka shfaqur sjellje të dhunshme, duke thyer xhamin e përparmë të mjetit si dhe xhamin e derës anësore. Specialistët për Hetimin e Krimeve pranë Komisariatit Nr. 2 kryen veprimet hetimore të nevojshme, të cilat çuan në prangosjen e personit në fjalë.
Materialet procedurale i janë referuar Prokurorisë për hetime të mëtejshme. I riu përballet me akuzat për dy vepra penale: “Shkatërrimi i pronës” dhe “Prishja e qetësisë publike”. Ngjarja shkaktoi panik te udhëtarët që ndodheshin brenda autobusit në momentin e incidentit.