Policia e Korçës arrestoi në flagrancë shtetasin D. M., 34 vjeç, banues në fshatin Braçanj të Devollit, në kuadër të operacionit policor "Braçanj". Ky operacion u zhvillua më 14 mars për goditjen e veprimtarive të paligjshme të prodhimit dhe shitjes së lëndëve narkotike, kultivimit të bimëve narkotike si dhe mbajtjes pa leje të municioneve luftarake.
Specialistët e Seksionit për Hetimin e Narkotikëve të Drejtorisë Vendore të Policisë Korçë, në bashkëpunim me Komisariatin e Policisë Devoll, vepruan bazuar në informacione operative. Gjatë kontrollit fizik të D. M. iu gjet një sasi e vogël lënde të dyshuar narkotike kokainë. Në banesën e tij u gjetën fara kanabisi, një sasi municioni luftarak dhe një shumë parash, të cilat u sekuestruan si provë materiale.
Materialet procedurale iu referuan Prokurorisë së Korçës për veprime të mëtejshme.