Operacioni i policisë në qytetin e Korçës çoi në arrestimin e një 31-vjeçari dhe procedimin në gjendje të lirë të kushëririt të tij, një 28-vjeçar. Masa ndaj tyre erdhi pas kontrollit të ushtruar në automjetin që drejtohej nga 31-vjeçari, ku efektivët gjetën lëndë narkotike të dyshuara si kokainë dhe kanabis sativa.
Pas kontrollit në mjet, efektivët vijuan kontrollet në banesat e dy të rinjve. Sipas njoftimit zyrtar, në banesën e 31-vjeçarit u gjet një sasi shtesë kanabisi, ndërsa në banesën e 28-vjeçarit u konstatua një sasi e vogël e të njëjtës lëndë narkotike.
Për këto arsye, 31-vjeçari është arrestuar, ndërsa kushëriri i tij do të hetohet në gjendje të lirë nën akuzën e prodhimit dhe shitjes së narkotikëve. Materialet procedurale i janë përcjellë Prokurorisë pranë Gjykatës së Shkallës së Parë të Juridiksionit të Përgjithshëm Korçë për veprime të mëtejshme. Grupi hetimor vijon punën për dokumentimin e plotë të veprimtarisë së dyshuar kriminale.