Shtetasi G. M., 36 vjeç, banues në Prishtinë, ka rënë në prangat e policisë në pikën e kalimit kufitar të Morinës, pas një kontrolli të detajuar të ushtruar nga shërbimet e Policisë Kufitare. Bazuar në analizën e riskut, efektivët kaluan në vijë të dytë automjetin tip Benz që drejtohej nga i riu, ku gjatë verifikimit fizik u gjetën 11 kuti që përmbanin gjithsej 691 fishekzjarre.
Sipas njoftimit zyrtar, 36-vjeçari tentoi t’i fuste këto lëndë piroteknike në Republikën e Shqipërisë me qëllim që t'i tregtonte më pas në qytetin e Tiranës. Specialistët për Hetimin e Krimeve pranë Drejtorisë Vendore për Kufirin dhe Migracionin (DVKM) Kukës bënë arrestimin në flagrancë të shtetasit në fjalë. Materialet procedurale i janë referuar Prokurorisë për veprime të mëtejshme, ndërsa ndaj të arrestuarit rëndon akuza për veprën penale të "Kontrabandës me mallra të ndaluara ose të kufizuara".