Një 26-vjeçar me inicialet R. K., banues në Korçë, u arrestua në flagrancë nga shërbimet e policisë në aksin rrugor Elbasan-Tiranë. Ai transportonte me furgon 19 paketime (thasë) me veshje të imitimeve të markave të ndryshme, pa dokumentacion shoqërues. Vlera e këtyre mallrave arrin rreth 45 000 euro.
Specialistët e Seksionit për Hetimin e Krimit Ekonomik dhe Financiar pranë Drejtorisë Vendore të Policisë Tiranë (DVP Tiranë) organizuan dhe finalizuan operacionin policor të koduar „Wrong way”. Ky operacion u bazua në informacione të siguruara në rrugë operative dhe synoi parandalimin e veprimtarisë kriminale në fushën e kontrabandës së mallrave.
Si provë materiale u sekuestruan veshjet dhe furgoni i përdorur për transportin. Vijojnë hetimet për dokumentimin e plotë të kësaj veprimtarie të kundërligjshme dhe identifikimin e shtetasve të tjerë të mundshëm të përfshirë.
Materialet procedurale iu referuan Prokurorisë së Tiranës për veprime të mëtejshme.