Operacioni për goditjen e paligjshmërisë në kufi çoi në ndalimin e një automjeti tip Benz në Devoll, brenda të cilit udhëtonin 6 shtetas të huaj me origjinë nga Sudani. Aksioni u realizua nga Seksioni i Trafiqeve dhe Seksioni i Krimit Ekonomik dhe Financiar në Drejtorinë Vendore të Policisë (DVP) Korçë.
I arrestuari, Klajdi Muça, akuzohet për dhënie të ndihmës për kalim të paligjshëm të kufirit. Sipas hetimeve paraprake, shtetasit sudanezë po transportoheshin drejt Tiranës me synimin për të vijuar më pas udhëtimin drejt vendeve të tjera. Për këtë aktivitet, 23-vjeçari dyshohet se kishte planifikuar të përfitonte nga 600 deri në 700 euro për çdo person të transportuar.
Në cilësinë e provës materiale, policia ka sekuestruar automjetin e përdorur për transportin, disa aparate telefonike si dhe një sasi të hollash. Grupi hetimor, nën drejtimin e prokurorisë, vijon punën për dokumentimin e plotë të kësaj ngjarjeje, si dhe për identifikimin e personave të tjerë që mund të jenë të përfshirë në këtë veprimtari të paligjshme.
Në përputhje me legjislacionin në fuqi, çdo person gëzon prezumimin e pafajësisë deri në një vendim gjyqësor të formës së prerë.