Shërbimet e Policisë Rrugore të Drejtorisë Vendore të Policisë Durrës, gjatë patrullimit për parandalimin e aksidenteve dhe ndëshkimin e shkelësve të rregullave të qarkullimit rrugor, ndaluan në Shijak automjetin e drejtuar nga shtetasi I. M., 36 vjeç, banues në Shijak. Gjatë kontrollit me aparatin drogëtestues, ai rezultoi pozitiv për lëndët narkotike.
Në vijim të veprimeve procedurale, I. M. u arrestua në flagrancë. Materialet iu referuan Prokurorisë së Durrësit për veprime të mëtejshme.
Policia Rrugore e Durrësit njofton se gjatë tre muajve të fundit ka arrestuar 4 shtetas të tjerë për të njëjtën shkelje në Durrës, duke e çuar numrin total në 5 raste.
Policia Rrugore e Durrësit apelon te drejtuesit e automjeteve të respektojnë rregullat e qarkullimit rrugor dhe të mos drejtojnë mjetet në gjendje të dehur, në efekt të alkoolit apo lëndëve narkotike.