Strukturat e Drejtorisë Vendore të Policisë Vlorë ndërhynë mbrëmjen e së mërkurës në ambientet e një lokali në lagjen Uji i Ftohtë të Vlorës, pas njoftimit për një konflikt midis dy personave.
Sipas njoftimit policor, shtetasi A. Sh., 39 vjeç, banues në Vlorë, dyshohet se u konfliktua me shtetasin B. J., 30 vjeç, banues në Vlorë, për motive të dobëta. Sapo pa shërbimet e policisë, A. Sh. tentoi të fshehë një pistolë zjarri me krehër me fishekë në një lulishte pranë.
Ndërhyrja e menjëhershme e policisë parandaloi përshkallëzimin e situatës. Në përfundim të veprimeve procedurale, A. Sh. u arrestua në flagrancë, ndërsa pistoleta me municion u sekuestrua në cilësinë e provës materiale.
Materialet iu referuan Prokurorisë për veprime të mëtejshme. Disa burime e identifikojnë të arrestuarin si Andi Shquti.
Drejtoria Vendore e Policisë Vlorë thekson angazhimin për garantimin e rendit dhe sigurisë publike, duke reaguar me vendosmëri ndaj rasteve që cenojnë qetësinë e qytetarëve.