Shërbimet e Policisë goditën dy raste të mbajtjes pa leje të municionit dhe armëve në Vlorë e Lushnjë.
Vlorë
Specialistët e Seksionit për Hetimin e Krimeve në Komisariatin e Policisë Vlorë kryen kontroll në banesën e shtetasit A. C. (Aldo Collari), 35 vjeç, banues në Vlorë. Atje gjetën dhe sekuestruan 158 fishekë luftarakë dhe 1 kallëp lëndë plasëse, të dyshuar si tritol. Ai u arrestua në flagrancë për veprën penale “Mbajtja pa leje dhe prodhimi i armëve, armëve shpërthyese dhe municionit”. Materialet procedurale i kaluan Prokurorisë pranë Gjykatës së Shkallës së Parë Vlorë.
Lushnjë
Shërbimet e Komisariatit të Policisë Lushnjë ndërhynë në një bar-kafe në lagjen Xhevdet Nepravishta, pas informacioneve operative për një shtetas të armatosur. Gjatë kontrollit gjetën në xhepin e një xhupi të lënë në tavolinë një armë zjarri tip pistoletë me municion luftarak. Xhupi i përkiste shtetasit M. S. (Marlind Sulo), 21 vjeç, banues në Lushnjë, i cili ishte larguar pak minuta më parë drejt një berberhaneje dhe u shpall në kërkim për veprën penale “Mbajtja pa leje dhe prodhimi i armëve, armëve shpërthyese dhe municionit”.
Pesë të rinj në të njëjtën tavolinë u arrestuan për “Moskallëzim i krimit”, pasi nuk treguan pronësinë e armës dhe penguan policinë:
- E. K. (Eri Kasapi), 20 vjeç;
- S. Sh. (Saviol Shehu), 24 vjeç;
- G. M. (Gledion Mullaj), 21 vjeç;
- H. T. (Helio Toli), 20 vjeç;
- L. S. (Lusian Sulo), 22 vjeç.
Gjatë kontrollit në banesën e M. S. u gjet municion shtesë luftarak. Sekuestruan armën, municionin, 1 automjet dhe 5 celularë. Materialet iu referuan Prokurorisë së Fierit.