Operacioni policor i koduar "Siguria 2" u finalizua nga shërbimet e Komisariatit të Policisë Himarë, në bashkëpunim me Forcën e Posaçme Shqiponja të DVP Vlorë. Shtetasi Ermal Hamzo, 38 vjeç, u ndalua në zonën e njohur si "Kthesa e Pilurit" në Himarë, ndërsa po udhëtonte me automjet.
Gjatë kontrollit fizik dhe atij të çantës që mbante me vete, shërbimet e Policisë gjetën një pistoletë me fishekë në fole dhe një granatë. Në vijim të hetimeve, forcat e policisë zhvilluan një kontroll edhe në banesën e 38-vjeçarit në Vlorë. Aty u zbuluan dhe u sekuestruan një tjetër pistoletë, krehra me municion luftarak, si dhe pajisje mbrojtëse, përfshirë dy jelekë antiplumb dhe dy jelekë multifunksionalë.
Në total, provat materiale të sekuestruara përfshijnë 2 pistoleta, 1 granatë, municion luftarak, 4 jelekë, automjetin dhe dy telefona celularë. Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Vlorë. I arrestuari akuzohet për veprat penale "Mbajtje pa leje dhe prodhim të armëve, armëve shpërthyese dhe municionit" dhe "Mbajtje pa të drejtë e uniformës".