Operacioni policor i koduar "Siguria" u zhvillua në lagjen "Lef Sallata" të qytetit të Vlorës, pas informacioneve të siguruara në rrugë operative se një shtetas qarkullonte i armatosur. Shërbimet e Drejtorisë Vendore të Policisë Vlorë kanë ndaluar automjetin tip "Audi" me të cilin udhëtonte 32-vjeçari me iniciale E. M.
Në cilësinë e provës materiale, autoritetet sekuestruan:
• Një armë zjarri pistoletë;
• Dy krehra me 22 fishekë luftarakë;
• Një mbajtëse plastike me 18 fishekë luftarakë;
• Një radio që i ngjan pajisjeve të përdorura nga Policia e Shtetit.
Sipas njoftimit zyrtar, materialet procedurale i janë referuar Prokurorisë për veprime të mëtejshme. Ndaj të ndaluarit rëndojnë akuzat për veprat penale "Prodhimi dhe mbajtja pa leje e armëve luftarake dhe e municionit" si dhe "Mbajtja pa të drejtë e uniformës".
Përditësime
Policia e Vlorës ka identifikuar 32-vjeçarin e arrestuar si Eris Mara, i cili u ndalua gjatë një operacioni për posedim të paligjshëm të armëve dhe pajisjeve të komunikimit.