Një shtetas 49-vjeçar nga Nerodimja e Poshtme e Ferizajt, i identifikuar si B.B., është ndaluar nga autoritetet kufitare në Karasoviq, në kufirin midis Kroacisë dhe Malit të Zi. Arrestimi është kryer në bazë të një fletarresti ndërkombëtar të lëshuar nga Serbia, ndërsa mediat kroate raportojnë se ndaj tij rëndojnë dyshime për përfshirje në krime lufte.
Lidhur me statusin e të arrestuarit, nënkryetari i Organizatës së Veteranëve të Luftës së UÇK-së (OVL-UÇK), Gazmend Syla, ka sqaruar se deri më tani nuk ka prova që ai të ketë qenë pjesë e luftës. Pas verifikimeve të kryera në zonën e Nerodimës dhe në atë të Kosharës, nuk është gjetur asnjë person me këtë identitet në regjistrat e veteranëve.
“Bazuar në verifikimet që kam bërë deri më tani, nuk figuron në listat e zonës së Nerodimës. Po ashtu, kam hulumtuar edhe në zonën e Kosharës dhe as aty nuk ka ndonjë person me këtë emër. Pra, 99 për qind ky nuk është veteran, nuk ka përfituar certifikatë të veteranit”, deklaroi Syla për Klan Kosova.
Ai shtoi gjithashtu se ka kontaktuar me kryetarin e OVL-UÇK-së në Ferizaj, i cili gjithashtu nuk ka gjetur të dhëna për personin në fjalë. Syla nënvizoi se organizata do të vazhdojë verifikimet e mëtejshme për të sqaruar rastin.