Policia e Fierit zbuloi në Patos një subjekt ku çmontoheshin dhe shiteshin pjesë automjetesh të dyshuara të kontrabanduara nga shtete të ndryshme të Europës.
Specialistët e Seksionit për Hetimin e Krimeve Ekonomiko-Financiare të Drejtorisë Vendore të Policisë Fier kryen hetime për një rast të kryerjes së aktivitetit ekonomik me produkte të kontrabanduara. Ata arrestuan shtetasin Xh. H., 50 vjeç, banues në Patos.
Gjatë kontrollit në subjektin e tij, një servis automjetesh në Patos, u gjetën automjete pjesërisht të çmontuara dhe pjesë automjetesh. Nga verifikimet rezultoi se ky shtetas nuk ishte i pajisur me licencën përkatëse për ushtrimin e këtij aktiviteti.
Policia sekuestroi 4 automjete pjesërisht të çmontuara dhe pjesë të tjera automjetesh. Materialet procedurale iu referuan Prokurorisë së Fierit për veprime të mëtejshme.