Një shtetas shqiptar, K. D., 55 vjeç, banues në Kukës, u arrestua në flagrancë në kufirin midis Kosovës dhe Shqipërisë. Ngjarja ndodhi në pikën e kalimit kufitar Qafë Shishtavec, në hyrje të Republikës së Shqipërisë.
Sipas njoftimit të Policisë së Kukësit, specialistët për Hetimin e Krimeve të Drejtorisë Vendore të Policisë Kufitare Kukës kryen kontrolle në hyrje/dalje për të parandaluar dhe goditur paligjshmëritë në kufi. Gjatë kontrollit të automjetit që drejtonte i arrestuari, u gjetën 510 litra naftë të dyshuara si të kontrabanduara nga Kosova.
Sasia e naftës u sekuestrua. Materialet procedurale iu referuan Prokurorisë së Kukësit për veprime të mëtejshme dhe zbardhjen e plotë të aktivitetit të paligjshëm.