Drejtori i Policisë së Beogradit, Veselin Milić, u arrestua në kuadër të hetimit për zhdukjen e Aleksandar Nesović, i njohur si “Baja”. Viktima 52-vjeçare u pa për herë të fundit më 12 maj 2026 në restorantin “27” në zonën Senjak të Beogradit.
Sipas Prokurorisë së Lartë Publike, Milić dyshohet se organizoi një takim mes dy drejtuesve të grupeve rivale kriminale me qëllim pajtimin e tyre. Takimi përfundoi me konflikt, gjatë të cilit njëri prej tyre, i identifikuar me inicialet S.B., qëlloi për vdekje Nesović-in. Milić dhe tre efektivë të sigurisë së tij personale dyshohet se ndihmuan për zhdukjen e trupit dhe pastrimin e vendit të ngjarjes nga provat.
Prokuroria ka ngritur akuza për moslajmërim të veprës penale dhe ndihmë pas kryerjes së krimit. Ministria e Brendshme e Serbisë njoftoi menjëherë shkarkimin e Milić-it nga detyra. Në të njëjtin operacion u arrestuan edhe pronari dhe kamerieri i restorantit, si dhe pesë persona të tjerë, përfshirë Sasa Vuković “Boske”, i dyshuar për tentativë vrasjeje.
Hetimet vazhdojnë për të sqaruar rolin e plotë të të arrestuarve dhe rrethanat e ngjarjes.